0
Posted April 21, 2015 in Amharic news
 
 

ከዲሞክራሲያዊ ለውጥ በኢትዮጵያ ድጋፍ ድርጅት ኖርዌይ የተሰጠ መግለጫ  !


ግፍና መከራ፣ ሰቆቃና ችግር ያልተለየው ሕዝባችን ዛሬም እንደገና ሌላ ችግር ዛሬም እንደገና ሌላ መከራ፣ ሌላ የጭካኔ በትር ሌላ የመከራ አረንቋ ውስጥ እየተዘፈቀና ያለእረፍት እየማቀቀ መሆኑ ሳያንሰው ባለፉት ጥቂት ሳምንታት ደግሞ ለማየት የሚዘገንኑ ለመስማት የሚከብዱ  መከራዎችን በላይ በላዩ እየተጋተ ይገኛል። 

ካለፉት ሶስት ሳምንታት ወዲህ ብቻ እንኩዋን በየመን በሚገኙ ወገኖቻችን ላይ እየደረሰ ያለው በተዋጊ ጀቶች መደብደብን ጨምሮ በደቡብ አፍሪካ ኢትዮጵያዊያን በህይዎት እንዳሉ በእሳት መቃጠልና ጭካኔ የተሞላበት ጭፍጨፋ ከፈጠረብን የሐዘን ጥቁር ድባብ ሳንወጣ በትላንትናው እለት (ሚያዚያ 11 ቀን 2007) ደግሞ አይ ኤስ አይ ኤስ (ISIS) እየተባለ በሚጠራው ዓለማቀፍ አሸባሪ ቡድን በሊቢያ በስደት ላይ በሚገኙ ሰላሳ ወገኖቻችን ላይ የጥይት ድብደባና የአንገት መቀላት ዘግናኝ ጭፍጨፋ መድረስን መሰማታችን ከልክ በላይ አሳዝኖናል። አስከፍቶናልም።

በሀገራችን ኢትዮጵያ እለት ከእለት እየታየ ባለው ዘርፈ ብዙ፣ የተደራጀና ማለቂያ የሌለው አፈናና አድልዎ እንዲሁም የፖለቲካ ጫና ምክንያት በሀገራቸው ሰርተው ራሳቸውንም ሆነ ቤተሰቦቻቸውን ማማስተዳደር ባለመቻላቸው  በምሬት ከሀገር እየወጡ ያሉት እምቅ ሃይል ያላቸው ወጣት ወገኖቻችን  በሰው ሀገር እየተቀበሉት ያለው ሰቆቃ ሳያንስ ህይዎታቸውን በዚህ መልክ በጭካኔ ማጣታቸው  እኛን ወገኖቻቸውን ይቅርና ህሊና አለኝ የሚልን ማንኛውንም ሰብአዊ ፍጡር ማስጨነቁም ሆነ ማሳዘኑ የግድ ነው።  በመሆኑም የዲሞክራሲያዊ ለውጥ በኢትዮጵያ ድጋፍ ድርጅት ኖርዌይ በየመን፣ በደቡብ አፍሪካ እንዲሁም በትላንትናው እለት በሊቢያ በጭካኔ ባለቁት ወጣት ኢትዮጵያዊያን ወገኖቻችን ጥልቅ ሃዘን ተሰምቶታል።

የዲሞክራሲያዊ ለውጥ በኢትዮጵያ ድጋፍ ድርጅት ኖርዌይ ፣ በኢትዮጵያ የሚገኘው ፋሽስታዊ አገዛዝ ስለራሱና ስለተወሰኑት የጥቅም ተጋሪዎች ብቻ ማሰቡን ትቶ እያስተዳደርኩት ነው ስለሚለው ሕዝብ እንዲሁም እየመራሗት ነኝ ስለሚላት ሀገራችን ኢትዮጵያ በጎ ማሰብ እስካልጀመረ ድረስ ሰሞኑን እያየነውና እየሰማነው ያለው እጅግ ዘግናኝ መርዶ የመጨረሻ እንደማይሆን ለሁሉም ሃገር ወዳድ ኢትዮጵያዊ ግልጽ እየሆነ የመጣ እውነታ ነው። ስለሆነም  በሀገር ውስጥም ሆነ በውጭ የምንገኝ ኢትዮጵያዊያን ወገኖች ከዚህ መራር ግፍና መከራ ለመላቀቅ የችግራችን መሰረታዊ መንስኤ በሆነው ጠላታችን ላይ ማተኮር አለብን ብሎ የዲሞክራሲያዊ ለውጥ በኢትዮጵያ ድጋፍ ድርጅት ኖርዌይ በጽኑ ያምናል። ይህም መሰረታዊ ችግራችን  ሰሞኑን በተለያዩ የዓልም ሀገራት በግፍ የተጨፈጨፉት  ወገኖቻችን  የሚወዷት  እናት ሀገራቸውን በምሬት ጥለው እንዲሰደዱ ያደረጋቸው  የወያኔ አገዛዝ ስርአት ነው።

 በመለው ዓለም በስደት የምንገኝ ኢትዮጵያዊያን፤ የሕዝባችንም ሆነ የሀገራችን መሰረታዊ ጠላት የሆነውን  የወያኔ  አገዛዝ ላንዴና ለመጨረሻ ጊዜ ነቅለን ለመጣልና በወገኖቻችን ላይ እየደረሰ ያለውን ይህ ሁሉ ስደት ስቃይና የጭካኔ ሞት ለማስቆም ከመቼውም ጊዜ በላይ ከፍተኛ ርብርብ እናድርግ በማለት ጥሪዉን ያቀርባል።   

   የዲሞክራሲያዊ ለውጥ በኢትዮጵያ ድጋፍ ድርጅት ኖርዌይ !!