0
Posted May 9, 2014 in Amharic news
 
 

የዲሞክራሲያዊ ለውጥ በኢትዮጵያ ድጋፍ ድርጅት ኖርዌ የወያኔ መንግስት በኦሮሞ ኢትዮጵያውያን ተማሪዎች ላይ ያደረሰውን ግድያ በመቃወም የወጣ የአቋም መግለጫ ሜይ 8/2014 ኖርዌ


እኛ የዲሞክራሲያዊ ለውጥ በኢትዮጵያ ድጋፍ ድርጅት አባላት የወያኔ መንግስት በኢትዮጵያ ኦሮሞ ወጣት ተማሪዎችና ሕዝብ ላይ ያደረሰውን ግድያ በጥብቅ እናዋግዛለን! ለሃያ ሶስት አመታት በሙሉ በስልጣን ላይ ሲቀመጥ የኢትዮጵያን አርሶ አደር ገበሬ መሬቱን በመቀማት ከቀየው በማፈናቀልና በማባረር፣ ዜጎችን በማሰርና በመግደል የሚታወቀው አረመኔው የወያኔ መንግስት እንደለመደው አሁንም ቀጥሎበታል::
የዋልድባን ገዳም ማፍረሱ፣ ከቤንሻንጉል፣ የአማራ ተወላጆችን ማፈናቀሉ፣ በጋምቤላ መሬት ቆርሶ መሸጡና በህዝቡ ላይ ጭፍጨፋ ማድረጉ፣ የእምነት ነፃነት መቀማቱን፣ መሪዎቹን ማሰሩ፣ የክርስትናን ሃይማኖት በሰላዮቹና በካድሬዎቹ ማፈኑ አልበቃ ብሎት ድሃ ገበሬዎችን አፈናቅሎ መሬት ለመሸጥ የድለላ ስራ ተያይዟል። ሰሞኑን ምንም አይነት የሕዝብ ውይይት ያልተደረገበትንና ብዙዎችን እያወዛገበ ያለው፣ የወያኔ ኢህአዲግ መንግስት ያወጣው የአዲስ አበባ እና ኦሮሚያ ልዩ ዞን የተቀናጀ የልማት መሪ ፕላን ያስቆጣቸው የኦሮሞ ተወላጆ በወያኔ መንግስት ላይ የተቃውሞ ድምጻቸውን ማሰማታቸው ይታወቃል።

ይህን በአዲስ አበባ ማስተር ፕላን ስም ሆነ ተብሎ የድሀ ገበሬዎችን ለመፈናቀል ተግባራዊ ሊደረግ የታሰበውን እቅድ በመቃወምና ሰልፍ በማድረግ የወያኔ ኢህአዲግን ክፉና መሰሪ አሳብ በመቃወማቸው የተነሳ ብዙ የኦሮሞ ተማሪዎችና ሕዝቦች መደብደባቸው፣መታሰራቸውና፣ መገደላቸው የሚታወቅ ሲሆን ነገር ግን ህገ መንግስታዊ መብታቸውን ተጠቅመው ሰልፍ ከማድረጋቸው አንጻር መብታቸው ሊከበር ሲገባው በነገ የሀገሪቷ ተስፋ በሆኑት ወጣት የኦሮሞ ተማሪዎች ላይ የዚህን አይነት በጭካኔ የተሞላ ኢሰብአዊ ግድያ መፈጸም ትግሉን ተስፋ የሚያስቆርጥ ሳይሆን በይበልጥ መላውን የኢትዮጵያ ሕዝብ በንዴት፣ በአንድነትና በፍቅር ይበልጥ በወያኔ መንግስት ላይ በእልህ እንዲነሳሳ የሚያስደርገው ድርጊት እንደሆነ የድጋፍ ድርጅታችን ያምናል።

ይህን በወያኔ መንግስት በኩል በንጹሀን የኦሮሞ ተማሪዎችና ህዝብ ላይ የደረሰውን ህገወጥ ድብደባ፣ እስራትና ግድያ የድጋፍ ድርጅታችን ዲሞክራሲያዊ ለውጥ በኢትዮጵያ ድጋፍ ድርጅት ኖርዌ ፈጽሞ የሚያውግዘው እና ድርጅታችንን ያስቆጣና ያሳዘነ አረመኔያዊ ድርጊት ከመሆኑ ባሻገር የጥቃቱ ሰለባ ለሆኑና ለሞቱ ዜጎች ለቤተሰቦቻቸው መጽናናትን እየተመኘን፣ የታሰሩ ወጣት የኦሮሞ ተማሪዎች በአስቸኳይ እንዲፈቱ እንጠይቃለን። ድርጅታችን የወያኔን መንግስት ለማስወገድ በጽናት ከሚታገሉ ድርጅቶች ጎን እንደሚቆም በመግለጽ የእነዚህን ወጣት የኦሮሞ ተማሪዎችን ህይወት ያስቀጠፉ አምባገነኖች በአስቸኳይ ለፍርድ እንዲቀርቡ ዲሞክራሲያዊ ለውጥ በኢትዮጵያ ድጋፍ ድርጅት ኖርዌ ይጠይቃል።

በሁለገብ ትግል ሕዝባዊ ድል እንቀናጃለን!!

የዲሞክራሲያዊ ለውጥ በኢትዮጵያ ድጋፍ ድርጅት ኖርዌ